Юбілейная святыня — касцёл Беззаганага Зачацця Панны Марыі ў Удзеле

Парафіяльныя аб'явы Літургічны каляндар Катэхеза Кантакты Відэаматэрыялы

Юбілейная святыня — касцёл Беззаганага Зачацця Панны Марыі ў Удзеле

Касцёл Беззаганага Зачацця Панны Марыі ў Удзеле — помнік архітэктуры барока з рысамі класіцызму, пабудаваны ў 1766-1791 гг.. Комплекс уключае касцёл, кляштар, Сялібу Беззаганнай, гаспадарчыя пабудовы, цагляную агароджу з брамай-званіцай. У 2002 годзе ў Удзеле было заснавана Мястэчка Беззаганнай (беларускі Непакалянаў).

Праз наведванне юбілейнай святыні, сакрамант пакаяння, падмацаванне святой Камуніяй і малітву ў інтэнцыях Святога Айца можна атрымаць поўны адпуст, прабачэнне і адпушчэнне сваіх грахоў, які таксама можна ахвяраваць за душы, якія церпяць у чысцы.

У буднія дні святая Імша ў касцёле цэлебруецца а 18-ай гадзіне, у нядзелю — а 11-ай. Перад Эўхарыстыяй айцы францішкане заўсёды паслугоўваюць у канфесіянале.

Заслугоўвае ўвагі тэрыторыя комплексу. Яна вылучаецца ўдалым спалучэннем кветкава-дэкаратыўнага аздаблення і шматлікіх помнікаў. Сярод іх: помнік Ненароджанаму дзіцяці; помнік заснавальніку Рыцарства Беззаганнай святому Максімільяну Марыя Кольбэ; помнік у выглядзе зямнога шара з указаннем месцаў размяшчэння кляштараў Беззаганнай у свеце, які быў устаноўлены і асвечаны ў 2022 годзе падчас святкавання дваццацігоддзя заснавання Мястэчка Беззаганай.

Непакалянаў з'яўляецца цэнтрам Рыцарства Беззаганнай на Беларусі. "Здабыць увесь свет для Беззаганнай" — гэтыя словы св.Максімільяна Кольбэ коратка і дакладна вызначаюць місію Рыцарства, мэта якога — клапаціцца пра навяртанне грэшнікаў і тых, хто яшчэ не пазнаў Хрыста, маліцца за ворагаў Касцёла, дбаць пра еднасць хрысціянаў, а таксама пра асвячэнне ўсіх людзей пад апекай і праз пасрэдніцтва Найсвяцейшай Панны Марыі Беззаганнай.

Айцы францішкане, якія апякуюцца Рыцарствам, дбаюць найперш пра духоўную фармацыю вернікаў, якая немагчыма без пазнання гісторыі развіцця Рыцарства і лёсу яе заснавальніка. З гэтай мэтай у сутарэннях, якія знаходзяцца пад касцёлам, наладжана фотавыстава, якая расказвае пра гісторыю Рыцарства і дзейнасць айцоў францішканаў.

На тэрыторыі комплексу размяшчаецца Сяліба Беззаганнай, якая была асвечана ў маі гэтага года. Дом Марыі з'яўляецца месцам правядзення рэкалекцый і духоўных сустрэч. У ім размешчана капліца, у якой захоўваецца Найсвяцейшы Сакрамант, а таксама жылыя пакоі, кухня, месцы для рэкрэацыі і адпачынку.

Заахвочваем наведаць юбілейную святыню ў Удзеле, каб скарыстацца магчымацю атрымаць адпуст, а таксама пазнаёміцца з гісторыяй Беларускага Непакалянава і Рыцарства Беззаганнай. Пры жаданні, ахвотныя могуць папоўніць шэрагі рыцараў.

Жанна Закрэўская,
19.07.2025