Карытас

Парафіяльныя аб'явы Карысныя спасылкі Літургічны каляндар Катэхеза Відэаматэрыялы Кантакты

Карытас

Вялікая любоў Бога да свайго стварэння, бясконцая міласэрнасць, аказаная людзям у Езусе Хрысце, з’яўляюцца для нас заклікам любіць адзін аднаго, служыць бліжнім, аддаваць ім свае таленты, свой час, свае сілы. Святы Ян Багаслоў у сваім пасланні піша: «...той, хто не любіць брата свайго, якога бачыць, не можа любіць Бога, якога не бачыць» (1 Ян 4, 19-20).

Слова caritas — лацінскае, яно азначае «любоў» у кантэксце братняй дапамогі і апекі. Гэтым тэрмінам з канца XIX стагоддзя акрэсліваюцца таксама розныя кірункі дзейнасці Каталіцкага Касцёла ў галіне дабрачыннасці. Выкарыстанне агульнага тэрміну для касцёльнай дабрачыннай дзейнасці было звязана з імкненнем яе каардынацыі і аб’яднання. Касцёл працаваў у сферы дабрачыннасці на працягу ўсёй сваёй гісторыі, але толькі ў апошнія сто гадоў былі створаны спецыялізаваныя структуры, заданне якіх — каардынацыя дабрачыннай дзейнасці Касцёла.

Сёння «Карытас» на Беларусі з’яўляецца арганізацыяй, якая ажыццяўляе і накіроўвае дабрачынную дзейнасць у мясцовым Каталіцкім Касцёле. «Карытас» дзейнічае на падставе ўласнага статуту як дабрачыннае каталіцкае таварыства.

15 снежня 1999 года біскуп Віцебскі Уладзіслаў Блін выдаў Дэкрэт аб стварэнні дабрачыннага каталіцкага таварыства "Карытас" Віцебскай дыяцэзіі. Падрабязней пазнаёміцца з дзейнасцю дыяцэзіяльнага "Карытас" можна на афіцыйным сайце https://caritas-vitebsk.by.

У 2008 годзе ў Мёрах быў створаны парафіяльны "Карытас", дырэктарам якога стала Ганна Вайсковіч. У 2012 годзе пры падтрымцы польскага Caritas адбылося адкрыццё дзіцячага цэнтра на в.Паштовай 11. Асноўнымі накірункамі дзейнасці парафіяльнага "Карытасу" сёння з'яўляецца работа клуба для моладзі з абмежаванымі магчымасцямі "Карытас-Батэль" і аказанне гуманітарнай дапамогі інвалідам, адзінокім састарэлым, малазабяспечаным і мнагадзетным сем'ям.

Адкрыццё дзіцячага цэнтра Карытас, 2 верасня 2018 года