Вялікі чацвер

Парафіяльныя аб'явы Літургічны каляндар Катэхеза Кантакты Відэаматэрыялы

Вялікі чацвер

У Вялікі чацвер Імшою Вячэры Пана распачаўся Святы Пасхальны Трыдуум. З самой назвы бачна, што ў гэтай літургічнай цэлебрацыі ўспамінаецца Апошняя Вячэра, падчас якой Хрыстус устанавіў сакраманты Эўхарыстыі і Святарства, даючы вучням наказ аб братняй любові.

Падчас гаміліі дыякан Антон Тышко заўважыў, што ў Вялікі чацвер мы збіраемся, каб успомніць тры важныя падзеі нашай веры: устанаўленне Эўхарыстыі, устанаўленне святарства і запавет братняй любові. Евангелле паводле Яна, якое чытаем ў гэты вечар, засяроджваецца менавіта на трэцім аспекце — на ўчынках пакоры і любові, якімі Езус здзівіў сваіх вучняў, абмыўшы ім ногі перад Апошняй Вячэрай. У тыя часы абмыванне ног было справай найніжэйшых рабоў. Гэта быў абавязак, які даручаўся самым бедным слугам. А тут — сам Настаўнік і Пан становіцца на калені перад вучнямі. Гэтым учынкам Езус паказвае, што недастаткова любіць словамі — трэба любіць учынкамі. Недастаткова быць вялікім перад людзьмі — трэба быць слугою для ўсіх.

"Вялікі чацвер — гэта дзень, калі Езус дае нам самую моцную зброю супраць пыхі: пакору. Бо д'ябл упаў праз пыху, а Хрыстус перамог яго праз пакору" — падкрэсліў святар.

У Вялікі чацвер літургія сканцэнтравана вакол алтара. Асаблівая ўвага надаецца ўстанаўленню Эўхарыстыі, як Ахвяры Новага Запавету і формы пастаяннай прысутнасці ў супольнасці Касцёла, ахвяры сапраўднага Ягняці, якім ёсць Хрыстус. Эўхарыстыя — гэта ахвяра любові. Любоў чыніць так, што мы становімся здольнымі да яе спазнання і прыняцця ва ўзаемным замілаванні, у нашай самаахвярнасці.

У Вялікі чацвер Касцёл адзначае ўстанаўленне Езусам не толькі сакраманту Эўхарыстыі, але і святарства. З гэтай нагоды парафіяне павіншавалі пробашча парафіі ксяндза Андрэя Куліка, дыякана Антона Тышко і семінарыста Яна Каськевіча з Днём святарства і выказалі словы ўдзячнасці за іх служэнне.

Літургію Вялікага чацвярга завяршыў абрад перанясення Найсвяцейшага Сакраманту ў спецыяльна падрыхтаванае месца, якое сімвалізуе вязніцу, дзе быў зняволены Езус пасля арышту. Гэты абрад накіроўвае нас на перажыванне таямніцы еднасці з мукамі Хрыста. Табэрнакулюм застаецца пустым. Святар ідзе ў працэсіі з Найсвяцейшым Сакрамэнтам да месца, якое сімвалізуе Аліўны сад, дзе Езус у агоніі чакаў арышту. Ён прасіў апосталаў чуваць і маліцца разам з Ім.

Падчас перанясення Найсвяцейшага Сакраманту з алтара быў зняты абрус на знак таго, што да Вялікай ночы Уваскрасення на ім не будзе цэлебравацца святая Імша.

Адарацыя перад вязніцай працягвалася да 21-ай гадзіны.

Жанна Закрэўская
02.04.2026