Пальмовая нядзеля распачынае Вялікі тыдзень

Парафіяльныя аб'явы Літургічны каляндар Катэхеза Кантакты Відэаматэрыялы

Пальмовая нядзеля распачынае Вялікі тыдзень

Пальмовая або Вербная нядзеля – гэта свята ў гонар уваходу Езуса Хрыста са сваімі вучнямі ў Ерузалем на вясенняе свята Пасхі. Апошнюю нядзелю Вялікага посту называюць таксама Нядзеляй Мукі Пана. Яна распачынае Вялікі тыдзень, які заканчваецца ў Вялікдзень.

У гэты дзень вернікі, з галінкамі ўпрыгожанай вярбы ў руках, прыйшлі ў касцёл каб асвяціць яе. Зразумела, што само па сабе бласлаўленне вярбы без малітвы і ўсведамлення важнасці падзеі мала што значыць. На парозе Вялікага тыдня Пальмовая нядзеля пабуджае да разважанняў над бясконцай Божай любоўю і грэшнасцю чалавека. Пальмовая нядзеля — гэта апошняя “прамая” да здзяйснення галоўнай Таямніцы. "Пальмовыя галінкі, — піша святы Аўгустын, — гэта сімвал пашаны і пакланення, бо яны азначаюўць перамогу. Перамогу жыцця над смерцю".

Літургічнае адзенне святароў у Пальмовую нядзелю чырвонага колеру, бо падчас святой Імшы гучыць апісанне Мукі Хрыста. У адпаведнасці з рэкамендацыямі да Літургіі, у гэты дзень Евангелле, па магчымасці, чытаецца з падзелам на ролі. Словы Езуса традыцыйна чытае святар, іншыя — вернікі. Пасля слоў аб кананні Хрыста на крыжы, усе становяцца на калені і некаторы час захоўваюць маўчанне.

Пальмовая нядзеля распачынае Вялікі тыдзень – час перад Уваскрасеннем Хрыста. Тыдзень мае такі высокі ранг у літургіі Касцёла, што не дапускае ў гэты час нават святкавання ўрачыстасцяў. Калі б такія былі ў Вялікім тыдні, яны адкладаюцца на час пасля Вялікадня і пасля яго актавы (напрыклад, урачыстасць Звеставання Пана ў гэтым годзе будзе святкавацца 8 красавіка).

Аб важнасці Вялікага тыдня ў Літургіі Касцёла і для кожнага верніка асабіста казалі святары падчас гаміліі. Ксёндз Алег Зямчонак узгадаў пра асноўныя падзеі, якія мы будзем перажываць на працягу Вялікага тыдня. Пробашч парафіі ксёндз Андрэй Кулік застанавіўся на евангельскіх асобах, з якімі Езус сустрэўся ў апошнія дні свайго зямнога жыцця. Падкрэсліваючы важнасць узору тых людзей, якія былі побач і падтрымалі Хрыста перад Яго ўкрыжаваннем, святар выказаў надзею, што наша прысутнасць у касцёле, нашыя перажыванні і супольная малітва падчас Вялікага тыдня, будуць выразам нашай адданасці Хрысту і стануць доказам таго, што Яго мука і смерць на крыжы не былі дарэмнымі не толькі ў перспектыве збаўлення свету, але і асабіста для кожнага з нас.

Жанна Закрэўская