Францішак нарадзіўся ў 1567 г. у замку Торэнс каля Жэневы (сёння гэта Швейцарыя) ў сям’і арыстакратаў, якія паходзілі ад герцагаў Савойскіх, будучы найстарэйшым сярод 13 дзяцей. Быў надзвычай здольным да навучання. У 15 гадоў паступіў адначасова ў Сарбонскі ўніверсітэт і Езуіцкі калегіўм (Парыж). У першым вывучаў тэалогію і біблейскія навукі, а таксама грэчаскую і габрэйскую мовы, у другім спасцігаў азы класічных навук. Пасля гэтага, паводле патрабавання бацькі, паступіў у Падуанскі ўніверсітэт, дзе вывучаў свецкае і касцёльнае права. Сваю юрыдычную адукацыю завяршыў абаронай доктарскай дысертацыі.
Быў каталіцкім місіянерам, хоць і не выязджаў на іншыя кантыненты. Са згоды мясцовага біскупа адправіўся ў акругу Шабле, каб умацаваць у веры мясцовых католікаў, а таксама паспрабаваць вярнуць тых, хто перайшоў на кальвінізм. Каб трапіць туды, быў вымушаны пераадольваць горы Альпы, вышыня якіх у гэтым месцы дасягала ажно 4000 м.
Здабываў людзей для Хрыста і каталіцкай веры сваёй лагоднасцю. З лёгкасцю наладжваў кантакт з простымі людзьмі, умеў іх пераконваць, нярэдка выкарыстоўваючы жарты і вясёлыя гісторыі. У зносінах з людзьмі ён прытрымліваўся прынцыпу: “Кропляй мёду можна злавіць больш мух, чым цэлай бочкай воцату”.
Падчас сваёй місіянерскай дзейнасці выкарыстоўваў не толькі гукавыя, але і візуальныя сродкі ўздзеяння. Праходзячы праз вёскі і мястэчкі, на агароджах і сценах дамоў расклейваў плакаты, на якіх змяшчалася ў скарачэнні тлумачэнне асноўных праўдаў веры. Магчыма, за гэта Касцёл абраў яго заступнікам журналістаў.
Быў каталіцкім пісьменнікам. Напісаў сусветна вядомыя творы па хрысціянскай духоўнасці: “Шлях да рэлігійнага жыцця або "Філатэя”, “Тэатым, або трактат аб Божай любові” і інш., апроч гэтага каля 1000 лістоў. Яго творы, якія адрозніваюцца прыгожай мовай і стылем, належаць да класікі французскай літаратуры.
.JPG)
