Завяршылася дыяцэзіяльная пілігрымка Мінск-Рым у Святы 2025 год

Парафіяльныя аб'явы Літургічны каляндар Катэхеза Кантакты Відэаматэрыялы

Завяршылася дыяцэзіяльная пілігрымка Мінск-Рым у Святы 2025 год

Пілігрымка надзеі Мінска-Магілёўскай архідыяцэзіі да Базылікі Святога Пятра стала знакавай падзеяй у жыцці Каталіцкага Касцёла на Беларусі і мела шэраг адметных рысаў. Яна аб’яднала разам вернікаў з усіх чатырох дыяцэзій Беларусі і стала самай масавай ў гісторыі нашай краіны.

За час падарожжа пілігрымы на аўтобусах пераадолелі агульны шлях у 5 000 км і наведалі 4 юбілейныя святыні ў розных краінах Еўропы. Падчас побыту ў Ватыкане вернікі з Беларусі разам са сваімі іерархамі і святарамі прысутнічалі на агульнай аўдыенцыі Папы Льва XIV на Плошчы Святога Пятра. Упершыню ў Базыліцы Святога Пятра ў Ватыкане цэлебравалася святая Імша на беларускай мове, у якой прынялі ўдзел каля пяцісот пілігрымаў з розных куточкаў Беларусі.

Распачалася пілігрымка ўвечары 17 кастрычніка, калі 8 груп пад духоўнай апекай святароў вырушылі ў шлях. Кожны вернік меў сваю інтэнцыю пілігрымкі, але ўсіх яднала агульная мэта – наведванне Базылікі Святога Пятра ў Ватыкане.

Пілігрымы мелі пэўны маршрут, які прадугледжваў наведванне розных гарадоў Еўропы і знакавых месц Каталіцкага Касцёла, у тым ліку юбілейных святынь. Першым прыпынкам стаў Санктуарый Божай Міласэрнасці ў Лагеўніках, дзе адбылася святая Імша, якую ўзначаліў арганізатар і кіраўнік пілігрымкі ксёндз канонік Юрый Санько, пробашч парафіі Найсвяцейшай Тройцы (святога Роха). Звяртаючыся на пачатку Літургіі да вернікаў ён падкрэсліў: “Мы – пілігрымы надзеі, як адна сям’я, збіраемся разам ля алтара Пана, каб скласці Ахвяру праслаўлення ў месцы, дзе асаблівым чынам праявілася Божая Міласэрнасць”. Святар пажадаў кожнаму адчуць яе дотык і заахвоціў маліцца падчас Эўхарыстыі за свае парафіі, Бацькаўшчыну і ўвесь беларускі народ.

Тэму Божай Міласэрнасці працягнуў у гаміліі ксёндз Юзаф Сярпейка. Святар зазначыў, што вялікай ласкай для кожнага пілігрыма з’яўляецца магчымасць прысутнічаць ля крыніцы Божай Міласэрнасці і заклікаў кожнага адкрыць сваё сэрцы на яе.

Падчас наведвання Лагеўнікаў пілігрымы мелі магчымасць пазнаёміцца з гэтым велічным і прыгожым комплексам, які прысвечаны Божай Міласэрнасці. З нагоды наведвання санктуарыя пілігрымы атрымалі ў падарунак абразкі з рэліквіямі святой Фаўстыны.

На начлег спыніліся ў Кракаве, а на наступны день накіраваліся ў Вену – сталіцу Аўстрыі. У супольнай малітве ў аўтобусах, якой пачынаўся кожны дзень пілігрымкі, рэлігійных спевах і міні-канферэнцыях дарога ў 470 км праляцела незаўважна. Знаёмства з Венай распачалося з аглядавай экскурсіі. Затым адбылася святая Імша ў касцёле капуцынаў, якую ўзначаліў ксёндз канонік Кірыл Бардонаў.

Невялікая, але вельмі прыгожая юбілейная святыня, магчыма, не часта прымае такую вялікую колькасць вернікаў, таму з радасцю і цеплынёй прытуліла беларускіх пілігрымаў. Знакавым стаў той факт, што нядзельную гамілію да вернікаў прамовіў капуцын з Маладзечна – айцец Уладыслаў Мінько, які засяродзіў увагу на Слове Божым і акрэсліў ролю малітвы ў жыцці кожнага верніка. Святар заахвоціў не толькі адкрываць падчас малітвы перад Панам свае праблемы і цяжкасці, але адчыніць сваё вуха і сваё сэрца на голас Бога, каб зразумець, у чым ёсць Яго воля. Тады малітва стане сапраўднай сувяззю з нашым Створцам.

Пасля Эўхарыстыі ахвотныя змаглі наведаць крыпту, у якой спачываюць імператары Рымскай і Аўстрыйкай імперыі, а таксама чальцы іх сем'яў з дому Габсбургаў. У Вене, перад начным пераездам, пілігрымы затрымаліся на час абавязковага адстойвання аўтобусаў. Гэта дало магчымасць шырэй пазнаёміцца з гістарычнай часткай горада, наведаць знакаміты Сабор Святога Стэфана і памаліцца ў касцёле капуцынаў, які, з ласкі кусташа, заставаўся адчыненым для пілігрымаў да часу іх ад’езду ў Падую.

Пілігрымаў, якія прыбылі ў падуанскую юбілейную святыню – Базыліку Святога Антонія, чакаў неспадзяваны і вельмі прыемны сюрпрыз. Прыняць удзел у Эўхарыстыі і памаліцца разам з пілігрымамі прыбылі Мітрапаліт Мінска-Магілёўскай архідыяцэзіі арцыбіскуп Юзаф Станеўскі і Генеральны вікарый архідыяцэзіі біскуп Аляксандр Яшэўскі SDB, якія знаходзіліся ў Рыме з нагоды святкавання юбілейнага года.

Арцыбіскуп Юзаф Станеўскі ў прывітальным слове заўважыў, што падчас шляху, як пілігрымы надзеі, мы адведваем самыя знакамітыя месцы ў жыцці Касцёла, захапляючыся іх веліччу і прыгажосцю. Мы набліжаемся да той ці іншай святыні таму, што ў ёй жыве Бог. Сёння кожны з нас хоча дакрануцца гэтай святыні, каб у нашым жыцці мы змаглі рэалізаваць наказ Езуса Хрыста: “Ідзіце за мной.”

На завяршэнне Эўхарыстыі, у знак далучэння пастыраў дыяцэзіі да ліку пілігрымаў, ксёндз Юрый Санько ўручыў іерархам песведчанні пілігрымаў надзеі Мінска-Магілёўскай архідыяцэзіі, медаль юбілейнага году і адмысловыя бэйджы з лагатыпам юбілейнага года.

22 кастрычніка для пілігрымаў стаў кульмінацыйнай падзеяй, бо менавіта ў гэты дзень яны дасягнулі мэты свайго пілігрымавання. Ужо з раніцы перад уваходам у Ватыкан з’явіліся першыя пілігрымы. З кожнай хвілінай іх колькасць павялічвалася і з цягам часу ператварылася ў стракатую шматнацыянальную раку вернікаў, якія спяшаліся на агульную аўдыенцыю з Папам Львом XIV.

Беларускія пілігрымы ўліліся ў гэту раку і неўзабаве былі на Плошчы Святога Пятра, дзе а 10-ай гадзіне распачалася аўдыенцыя. Разам з пілігрымалі з Беларусі на плошчы былі таксама арцыбіскуп Юзаф Санеўскі і біскуп Аляксандр Яшэўскі SDB.

Па традыцыі Папа Леў XIV да месца прамаўлення гаміліі і малітвы праехаў на папамабілі праз шэрагі пілігрымаў, што дало магчымасць большай колькасці вернікаў зблізку ўбачыць пастыра Каталіцкага Касцёла. Групе вернікаў з Мінска-Магілёўскай архідыяцэзіі пашанцавала апынуцца на адлегласці некалькі метраў ад Святога Айца.

Пасля агульнай аўдыенцы пілігрымы з Беларусі прайшлі ў пілігрымцы ад Замка Святога Анёла праз Плошчу Святога Пятра. Менавіта гэты шлях вядомы ад першага Юбілею 1300 года, бо мост Святога Анёла над Тыбрам быў тады адзіным, па якім можна было трапіць да базылікі Святога Пятра. Наперадзе пілігрымы неслі вялікі крыж. Па чарзе знак збаўлення трымалі ў руках іерархі, святары, сёстры законныя, вернікі. Падчас шляху да Святых Дзвярэй маліліся на Ружанцы. Немагчыма перадаць, якія пачуцці перапаўнялі ў той момант сэрцы вернікаў.

Кульмінацыяй шляху стала праходжанне праз Святую Браму. Гэта не толькі адзін з найважнейшых абрадаў Юбілею, але, згодна з вучэннем Каталіцкага Касцёла, магчымасць атрымаць поўны адпуст для сябе або для памерлага, які знаходзіцца ў чыстцы.

А 15 гадзіне ў Базыліцы Святога Пятра распачалася святая Імша для пілігрымаў з Беларусі, у якой прынялі ўдзел каля пяцісот вернікаў. Эўхарыстыю, якая ўпершыню цэлебравалася поўнасцю на беларускай мове, узначаліў Старшыня ККББ Мітрапаліт Мінска-Магілёўскі арцыбіскуп Юзаф Станеўскі. Разам з ім Імшу канцэлебравалі каля дваццаці святароў, якія суправаджалі групы пілігрымаў з розных парафій, у тым ліку з Мінска, Бялыніч, Вілейкі, Віцебска, Гродна, Маладзечна, Нясвіжа, Нарачы, Шклова, Шуміліна і інш. Літургічны спеў выконваў хор з вілейскай парафіі.

Гамілію для вернікаў прамовіў Старшыня Камісіі Божага Культу і Дысцыпліны Сакрамэнтаў пры ККББ, Генеральны вікарый Мінска-Магілёўскай архідыяцэзіі Аляксандр Яшэўскі SDB. Ён адзначыў, што прысутнасць беларусаў ля магілы святога Пятра — гэта знак вернасці і еднасці з Паўсюдным Касцёлам.

Святая Імша для беларусаў прыцягвала ўвагу тых, хто знаходзіўся ў базыліцы. Пілігрымы з іншых краін спыняліся, каб паслухаць прыгожыя спевы, якія разам з хорам падхоплівалі ўсе беларускія вернікі. Кранальным і прыемным было пачуць, калі пасля завяршэння святой Імшы мелодыю песні “Маці Будслаўская” напяваў прадстаўнік службы парадку базылікі. Гэты факт сведчыць пра тое, што ўсіх людзей, не залежна ад нацыянальнасці, сацыяльнага статусу, месца жыхарства, праз веру, надзею і любоў яднае Усемагутны Бог. Гэта з Яго волі стала магчымай пілігрымка надзеі Мінска-Магілёўскай архідыяцэзіі ў Рым у Святы Юбілейны год, якая з’яднала вернікаў з усёй Беларусі ў адну вялікую сям’ю.
Жанна Закрэўская
29.10.2025