Урачыстасць Першай святой Камуніі

Парафіяльныя аб'явы Літургічны каляндар Катэхеза Кантакты Відэаматэрыялы

Першая святая Камунія

18 мая ў нашай парафіі адбылася ўрачыстая падзея. 26 дзяцей упершыню прынялі Цела Хрыста ў свае чыстыя, поўныя веры сэрцы. Першая Камунія з’яўляецца першым, святочным і свядомым актам спажывання Пана Езуса падчас Сакраманту Эўхарыстыі, які пад выглядам хлеба і віна прысутнічае сярод нас.

У прыгожым белым адзенні дзеці разам з бацькамі і роднымі прыйшлі ў святыню, якая таксама была па-святочнаму дэкаравана. Але самае галоўнае, што сэрцы маленькіх вернікаў з нецярпеннем чакалі Езуса ў выглядзе белай Гостыі. Дажджлівае надвор'е не дало магчымасці распачаць набажэнства на вуліцы, але не сапсавала радасны і святочны настрой.

Пасля малітвы і бацькоўскага бласлаўлення, дзеці ўрачыстай працэсііяй прайшлі праз касцёл бліжэй да алтара, каб праз удзел у літургіі праславіць Бога за дар Эўхарыстыі.

Святая Камунія – гэта сакрамант хрысціянскай сталасці, які ўводзіць у паўнату духоўнага жыцця. Падчас казання пробашч парафіі ксёндз Андрэй Кулік падкрэсліў, што рыхтуючыся да сакрамантаў споведзі і Камуніі, дзеці вывучалі запаведзі і асноўныя праўды Каталіцкай веры. Асноўнымі запаведзямі, на якіх грунтуецца наша хрысціянскае жыццё — гэта запаведзі Любові. Мы павінны навучыцца любіць бліжняга, як самога сябе і нават мацней. Прыклад такой любові нам дае сам Езус Хрыстус, які аддаў сваё жыццё на крыжы за кожнага з нас. Гэта прыклад бескарыслівай і адданай любові. "Хто спажывае Маё Цела і п’е Маю Кроў, мае жыццё вечнае, і Я ўваскрашу яго ў апошні дзень» — кажа Пан (Ян 6, 54). Бог хоча, каб мы прыходзілі да Яго, удзельнічалі ў Эўхарыстыі, спажывалі Яго Цела, а ў дар нам дае жыццё вечнае. Эўхарыстыя — гэта найбольшы Божы дар, хай ён умацоўвае нашых дзяцей і прыносіць багаты плён.

Пасля гаміліі, трымаючы ў руках запаленыя ад пасхала свечкі, дзеці аднавілі абяцанні хросту. Завяршылася літургія слова малітвай вернікаў і прынашэннем дароў.

Нарэшце доўгачаканы момант Эўхарыстыі. Неверагодна і кранальна бачыць, як хтосьці з усёй руплівасцю, з хваляваннем укленчвае перад Хрыстом, утоеным у маленькай гостыі, углядаецца ў Яго і з гучным "Амэн" прымае Яго да сябе.

Напрыканцы Імшы бацькі выказалі словы ўдзячнасці святарам за духоўную фармацыю дзяцей і ўдзяленне сакраманту першай споведзі і Першай святой Камуніі. Цёплыя словы прагучалі таксама ў адрас катэхеткі спадарыні Наталлі Гарноўскай, пад кіраўніцтвам якой на працягу двух гадоў дзеці пазнавалі асноўныя праўды веры.

Завяршылася ўрачыстасць уручэннем памятак аб Першай святой Камуніі і агульным фотаздымкам.

Наперадзе дзяцей чакае “белы тыдзень”, на працягу якога яны кожны дзень у белым адзенні будуць хадзіць у касцёл і дзякаваць за дар святой Камуніі. Як адзначыў пробашч парафіі ксёндз Андрэй Кулік, урачыстасць Першай святой Камуніі для маленькіх вернікаў працягваецца актаву. Гэта паказвае важную ролю ўрачыстасці ў жыцці канкрэтнай асобы і ўсёй парафіяльнай супольнасці.

Жанна Закрэўская

18.05.2025