Пробашч парафіі ксёндз Андрэй Кулік у сваёй гамілі адзначыў: "Вялікі пост рыхтуе нас да чарговага перажывання важных падзей — мукі, смерці і ўваскрашэння Хрыста, за якімі стаіць вялікая любоў Бога да нас. Бог на працягу гісторыі збаўлення не перастае ажыццяўляць усё новыя і новыя спробы прымірыць чалавека, які зграшыў, з Сабою. Гэты грэх стварыў прорву паміж Богам і чалавекам — яго стварэннем.
Касцёл навучае, што малітва, пост і добрыя ўчынкі з'яўляюцца панацэяй на ўсё тое зло, несправядлівасць і грахі, якія мы робім. Малітва скіраваная да Пана Бога, як акт перапрашэння Святасці Бога, якую мы абражаем. Пост, як спосаб самадысцыпліны і самаўтаймавання. І добрыя ўчынкі, як тое, што мы кіруем наш позірк у бок іншага чалавека, які з'яўляецца Божым стварэннем.
Вялікі пост — гэта нагода яшчэ раз, праз удзел ва ўсіх пабожных практыках, далучыцца да голасу шматлікіх вернікаў скіраванага да Бога Айца Міласэрнага."
