Да 110-годдзя з дня нараджэння кардынала Казіміра Свёнтка

Парафіяльныя аб'явы Літургічны каляндар Катэхеза Кантакты Відэаматэрыялы

Да 110-годдзя з дня нараджэння кардынала Казіміра Свёнтка

Кардынал Казімір Свёнтэк нарадзіўся 21 кастрычніка 1914 г. у Эстоніі ў Вальку, ахрышчаны быў у Рызе. Калі яму было 3 гады, яго сям’ю саслалі ў Сібір. Пасля заканчэння Вышэйшай духоўнай семінарыі ў Пінску 8 красавіка 1939 г. у тамтэйшай катэдры ён быў высвечаны на святара і скіраваны на працу ў Пружаны.

Кардынал Казімір Свёнтэк казаў: "Ведаеце, калі аднойчы Бог кагосьці зачапіў, то ўжо не адпусціць... Каля труны біскупа Лазінскага я выказаў просьбу заўсёды быць верным слугою Бога... І ён выслухаў мяне даслоўна... Калі я выходзіў з падзямелля пінскай катэдры ў тым далёкім 1933-м, то ўжо ведаў, што стану святаром. Дагэтуль я збіраўся паступаць на філалагічны факультэт у Віленскі універсітэт, але ўва мне раптам адбыўся нейкі пералом. Я сказаў сваім сябрам: «Я ў Вільню не паеду...» Але паколькі я тады быў вялікім жартаўніком, то сябры ўспрынялі гэта як чарговы жарт: «А куды ж, дазволь спытаць?..» «Я еду ў Пінскую семінарыю», — адказаў я. Для іх гэта быў апошні і найлепшы анекдот, мне пляскалі ў ладкі... А я вярнуўся дадому і ў той жа дзень напісаў заяву ў семінарыю і быў прыняты «ў выглядзе выключэння», бо тэрмін прыёму ўжо скончыўся. Чаму было зроблена тое «выключэнне»? " (паводле Ave Maria)

Вялікая колькасць выпрабаванняў спаткала Казіміра Свёнтка на дарозе яго жыцця, аднак непахісная вера ў Бога дала магчымасць годна іх пераадолець. Ён пражыў амаль 97 гадоў і зрабіў вялікі ўнёсак у адраджэння Касцёла ў Беларусі.

У выніку пераследавання рэлігіі ён быў арыштаваны і асуджаны на смерць. Два месяцы знаходзіўся ў камеры смерці. Вайна, якая распачалася ў 1941 г., перашкодзіла выканаць прысуд. Аднак у 1944 г. малады святар зноў быў арыштаваны і асуджаны на 10 гадоў лагераў, дзе цяжка працаваў спачатку ў Сібіры, а потым за Палярным кругам у Інце каля Варкуты.

Выйшаўшы на волю ў 1954 г., ён апынуўся ў Пінску. Нарэшце настала доўгачаканая хвіліна, калі можна было адправіць святую Імшу ў касцёле.

Дзякуючы самаадданай і ахвярнай працы ксяндза Казіміра Свёнтка адбудавана пінская катэдра — напэўна, гэта была адна з першых адбудаваных святыняў на Беларусі. Адбудоўваючы пінскую катэдру, ксёндз Казімір перадусім думаў і рабіў усё магчымае, каб будаваць жывы Касцёл — Народ Божы, жывымі камянямі якога з’яўляюцца вернікі.

Пастырская актыўнасць кс. прэлата Казіміра Свёнтка, яго адданасць справе Касцёла, незвычайныя арганізатарскія здольнасці, аўтарытэт і пашана сярод святароў не засталіся не заўважанымі Апостальскаю Сталіцаю. Святы Айцец Ян Павел ІІ у 1991 г. прызначыў яго першым Мітрапалітам новастворанай Мінска-Магілёўскай Мітраполіі і Апостальскім Адміністратарам Пінскай дыяцэзіі.

Ва ўзросце 77 гадоў новы Мітрапаліт распачаў сваё біскупскае служэнне. Ён візітуе парафіі, устанаўлівае дэканаты, стварае патрэбныя для Касцёла структуры, бароніць правы вернікаў, актыўна ўдзельнічае ў Сінодзе Біскупаў у 1991 г., у пасяджэннях Рады Канферэнцыі Біскупаў Еўропы і іншых касцёльных арганізацыях, у міжнародных форумах, канферэнцыях і г. д. Ён з’яўляецца сведкам пераследвання каталіцкай веры і яе адраджэння на Беларусі.

Брат Бэла Лані SVD, які доўгі час працаваў разам з кс.Казімірам Свёнткам, так успамінае пра святара:

"Пан Бог даў кардыналу Свёнтку сцежку кар’еры прынцыпова іншую, чым звычайным людзям, і ён гэта добра ўсведамляў. Навучыўся чакаць Бога, які плануе ў перспектыве вечнасці. Кс. Казімір Свёнтэк ніколі не марыў аб вялікай кар’еры ў Касцёле, да таго ж падчас савецкіх праследаванняў нават не меў на гэта шансу. Чакаў толькі, каб Бог зноў угледзеў людзей, якія жывуць на Беларусі. Стараўся захаваць веру падчас праследаванняў, каб пасля распачаць рэлігійныя практыкі. “Біскупам стаў у 77 гадоў, – распавядаў не раз. – У Ватыкане ў кампаніі біскупаў сказаў аднойчы: Айцы, памылка ёсць у Праве Кананічным. Усе прысутныя занямелі: чалавек нядаўна стаў біскупам, а ўжо крытыкуе Права Кананічнае. І я сказаў. Кананічнае Права гаворыць аб тым, што кожны біскуп павінен ісці на пенсію ва ўзросце 75 гадоў. Але што рабіць таму, хто найменаваны ва ўзросце 77 гадоў? На гэта адзін уплывовы кардынал адказаў: што ж, usgue ad mortem, тады працуйце да смерці!”

Часта думаў я пра лёс кардынала Свёнтка. Для чаго Бог пазбавіў ксяндза тых найцаннейшых гадоў яго працы? Для чаго наканавана была яму бяздзейнасць у яго 30–40 гадоў, калі кожны ксёндз найбольш актыўны? І для чаго Бог даў яму пазней, пад канец жыцця, добрую сілу, мабільнасць і нават касцёльны ранг у тую пару, калі іншыя святары ідуць на пенсію?" (часопіс "Дыялог")

Кардынал Казімір Свёнтэк у 1995-ым годдзе наведаў Мёры, аб чым у той час пісала раённая газета "Сцяг працы" (№7, 25.01.1995)

Кардынал Свёнтэк яшчэ з большай энергіяй і адвагай складае праграму адраджэння духоўнасці і падрыхтоўкі Каталіцкага Касцёла ў Беларусі да Вялікага Юбілею 2000 года. У гэтай праграме асаблівае месца прысвечана розным пастырскім праграмам, адбудове святыняў і найперш мінскай архікатэдры, а таксама працы Сіноду Мінска-Магілёўскай архідыяцэзіі Пінскай і Віцебскай (якая далучылася да Сіноду пасля яе ўтварэння) дыяцэзій, які кардынал распачаў у 1996 г. Знамянальны дэвіз Сіноду: «Усё аднавіць у Хрысце».

У гэты час па ўсёй Беларусі будуюцца новыя святыні. 1 чэрвеня 2002 года кардынал Казімір Свёнтэк асвяціў новы касцёл у Чавусах (Магілёўская вобл.), які быў пабудаваны пад кіраўніцтвам наша зямляка кс.Франца Рудзя.

Часопіс "Аве Марыя", №6, 2002г.

11 лютага 1999 г. кардынал Казімір Свёнтэк быў абраны першым Старшынёй Канферэнцыі Каталіцкіх Біскупаў у Беларусі — гэта падкрэслівае яго вядучую ролю ў Касцёле і ў краіне.

27 верасня 2004 г. Святы Айцец Ян Павел ІІ уручыў кардынару Казіміру Свёнтку, арцыбіскупу Мітрапаліту Мінска-Магілёўскаму, спецыяльную ўзнагароду «Fidei testis» (Сведка веры), прысуджаную Інстытутам Паўла VI.

14 чэрвеня 2006 г. Святы Айцец Бэнэдыкт XVI прыняў прашэнне аб вызваленні ад пастырскага кіраўніцтва Мінска-Магілёўскай архідыяцэзіяй, прадстаўленае Яго Эмінэнцыяй кардыналам Казімірам Свёнткам у адпаведнасці з Кодэксам Кананічнага Права, кан. 401, § 1.

Адышоў у вечнасць 21 ліпеня 2011 года.

Паводле Catholic.by