Шляхі да Сэрца Маці: анонс пілігрымак з Віцебскай дыяцэзіі ў Будслаў

Парафіяльныя аб'явы Літургічны каляндар Катэхеза Кантакты Відэаматэрыялы

Шляхі да Сэрца Маці: анонс пілігрымак з Віцебскай дыяцэзіі ў Будслаў

З набліжэннем урачыстасці Будслаўскай Маці Божай парафіі Віцебскай дыяцэзіі традыцыйна запрашаюць вернікаў узяць удзел у пілігрымках да нацыянальнага санктуарыя. У 2026 годзе, як і штогод, вернікі Паўночнай Беларусі змогуць абраць маршрут паводле сэрца, каб праз малітву і стому ўмацаваць сваю веру.

Віцебская дыяцэзія заўсёды адзначалася жывымі пілігрымковымі традыцыямі. Шлях да Будслава для многіх стаў не проста падарожжам, але важнай духоўнай падзеяй.

Расклад пілігрымак у 2026 годзе

Росіца – Будслаў
Пачатак – 26 чэрвеня
Айцы марыяне запрашаюць жадаючых прайсці праз Верхнядзвінск, Мёры, Германавічы, Падсвілле, Параф’янава, Задарожжа і Крулеўшчыну.
Кантакт: +37529 713-02-33 – кс. Аляксандр Жарнасек МІС

Віцебск – Будслаў
Пачатак – 27 чэрвеня
Адна з самых працяглых пешых пілігрымак стартуе з абласнога цэнтра. Шлях будзе праходзіць праз Віцебск, Шуміліна, Улу, Ушачы, Зябкі, Падсвілле, Докшыцы, каб фінішаваць у Будславе. Гэты маршрут падыходзіць для тых, хто гатовы да сур’ёзнай духоўнай і фізічнай працы.
Кантакты: +37533 350-75-34, +37544 773-40-76

Браслаў – Будслаў
Пачатак – 29 чэрвеня
Айцы сальватарыяне запрашаюць вернікаў прайсці шлях ад аднаго санктуарыя —Маці Божай Валадаркі Азёраў — да другога.
Кантакт: +37529 577-00-38 – кс. Уладзімір Шыдлоўскі SDS

Полацк – Будслаў: “Бог мой і ўсё маё”
Пачатак – 29 чэрвеня
За пяць дзён пілігрымы пераадоляць 133 кіламетры праз Ломашы, Плісу, Глыбокае і Параф’янава.
Кантакт: +37533 608-99-15 – кс. Антоній Тышко

Глыбокае – Будслаў: “Твой найлепшы маршрут — да Сэрца Маці”
Пачатак – 1 ліпеня
Не трэба шукаць ідэальны маршрут па карце ці купляць білет у далёкія краіны. Твой найлепшы маршрут у 2026 годзе — праз поле, лес, ранішнюю расу, вячэрнюю малітву і ўласную стому — проста да Сэрца Маці. Гэта не проста дарога, а асабістая сустрэча.
Кантакт: +37533 390-75-00 – кс. Андрэй Януль

Паставы – Будслаў: “Ідзі з верай. Ідзі з надзеяй. Ідзі з любоўю”
Пачатак – 1 ліпеня
Кароткі, але вельмі насычаны 77-кіламетровы шлях за тры дні. Гэта прапанова для тых, хто шукае кароткага, але глыбокага духоўнага рыўка пад дэвізам “Да Сэрца Езуса праз Сэрца Марыі”.

Важныя напамінкі для пілігрымаў

Усе пілігрымкі патрабуюць папярэдняй рэгістрацыі па кантактных тэлефонах альбо праз адпаведныя гугл-формы (інфармацыя аб рэгістрацыі ўдакладняецца ў арганізатараў).

Рэкамендуецца мець зручны абутак, дажджавік, неабходны запас вады і, галоўнае, — адкрытае сэрца на сустрэчу з Богам у братах і сёстрах.

Няхай Маці Божая Будслаўская вядзе кожнага пілігрыма, дапамагаючы знаходзіць сілы на гэтым складаным, але благаслаўлёным шляху. Усе маршруты вядуць да Яе — Маці Касцёла на беларускай зямлі.

Catholicnews.by