Урачыстасці ў Браславе

Парафіяльныя аб'явы Літургічны каляндар Катэхеза Кантакты Відэаматэрыялы

Урачыстасці ў гонар Маці Божай Валадаркі азёраў прайшлі ў Браславе

22 і 23 жніўня ў Дыяцэзіяльным санктуарыі Маці Божай Валадаркі азёраў у Браславе прайшлі ўрачыстасці пад дэвізам «З Марыяй да Бога — шлях надзеі». Ушанаваць Маці Божу Браслаўскую сабраліся шматлікія вернікі з розных куточкаў Беларусі. Ганаровым госцем свята стаў Апостальскі Нунцый у Рэспубліцы Беларусь арцыбіскуп Іньяцыё Чэффаліа.

Першыя пілігрымы на свята пачалі прыбываць 22 жніўня ў другой палове дня. Ля галоўнага ўваходу ў святыню іх віталі біскуп Віцебскі Алег Буткевіч і пробашч парафіі Нараджэння Маці Божай у Браславе ксёндз Станіслаў Мжыглуд SDS, кусташ санктуарыя. А 18-ай гадзіне распачалася канферэнцыя на тэму "Марыя — надзея Касцёла", якую прамовіў а.Міхаіл Цвячкоўскі МІС.

Эўхарыстычную цэлебрацыю з сакрамантам канфірмацыі ўзначаліў біскуп Гродзенскі Уладзімір Гуляй. Прыняць сакрамант хрысціянскай сталасці сабраліся кандыдаты з розных парафій Віцебскай дыяцэзіі, у тым ліку пяць нашых парафіянаў. У прывітальным слове біскуп Віцебскі Алег Буткевіч адзначыў: "Як пілігрымы надзеі збіраемся сёння тут, ля падножжа нашай з вамі Матулі — Маці Божай Браслаўскай — Валадаркі азёраў, Валадаркі нашых сэрцаў, каб скласці просьбы аб ласках, на якія спадзяемся, а таксама з удзячнасцю ў нашых сэрцах. Збіраемся, каб прасіць Духа Святога для нашых кандыдатаў".

Згодна закліку Папы Льва XIV, каб пятніца 22 жніўня быў днём малітвы і посту за мір, падчас святой Імшы асаблівым чынам маліліся аб супакоі ў свеце.

На заканчэнне Эўхарыстыі моладзь выказала словы ўдзячнасці біскупу Гродзенскаму Уладзіміру Гуляю і дапаможнаму бiскупу Пінскай дыяцэзіі Андрэю Зноску за ўдзелены сакрамант. Памятным падарункам аб важнай падзеі для кандыдатаў стаў агульны фотаздымак з іерархамі, якія цэлебравалі святую Імшу.

Пасля Эўхарыстыі малітоўную праграму працягнулі Акафіст і Крыжовы шлях, які адбыўся на вуліцы.

З наступленнем цемры, у касцёле перад цудадзейным абразом і выстаўленым Найсвяцейшым Сакрамантам вернікі склалі свае просьбы і падзякі да Маці Божай. Затым адбылася працэсія са свечкамі і копіяй цудадзейнага абраза Валадаркі азёраў. Яе ўдзельнікі на чале з іерархамі прайшлі вуліцамі Браслава, разважаючы над таямніцамі Ружанца і ўслаўляючы Панну Марыю сваімі спевамі.

Цэлебрацыю святой Імшы апоўначы ўзначаліў Мітрапаліт Мінска-Магілёўскі арцыбіскуп Юзаф Станеўскі. Гамілію прамовіў дапаможны бiскуп Пінскай дыяцэзіі Андрэй Зноска. У Эўхарыстыі бралі ўдзел біскуп Віцебскі Алег Буткевіч, біскуп Гродзенскі Уладзімір Гуляй, Апостальскі адміністратар для грэка-католікаў у Беларусі архімандрыт Сяргей Гаек, духоўныя асобы лацінскага і візантыйскага абрадаў.

Урачыстая святая Імша на алтары-караблі з удзелам Апостальскага Нунцыя стала кульмінацыяй фэсту ў гонар Маці Божай Браслаўскай. Прывітаць прадстаўніка Папы Льва XIV сабраліся вернікі, кіраўнікі мясцовай улады, святары і іерархі касцёла на Беларусі на чале з арцыбіскупам Юзафам Станеўскім і гаспадаром дыяцэзіі біскупам Алегам Буткевічам. Па старадаўняй беларускай традыцыі арцыбіскупа Іньяцыё Чэффаліа сустрэлі хлебам-соллю.

Разам з Апостальскім Нунцыем у Рэспубліцы Беларусь арцыбіскупам Іньяцыё Чэффаліа ў Эўхарыстыі бралі ўдзел Мітрапаліт Мінска-Магілёўскі арцыбіскуп Юзаф Станеўскі, біскуп Віцебскі Алег Буткевіч, біскуп Гродзенскі Уладзімір Гуляй, біскуп Пінскі Антонi Дзям’янка, біскуп Гродзенскі на пенсіі Аляксандр Кашкевіч, дапаможны бiскуп Пінскай дыяцэзіі Андрэй Зноска, Апостальскі адміністратар для грэка-католікаў у Беларусі архімандрыт Сяргей Гаек, шматлікія святары, кансэкраваныя асобы і вернікі.

Звяртаючыся з пастырскім словам, арцыбіскуп Іньяцыё Чэффаліа падзякаваў за запрашэнне на ўрачыстасці і перадаў айцоўскае прывітанне ад Святога Айца, Папы Льва XIV, і яго Апостальскае благаслаўленне. Нунцый падкрэсліў, што санктуарый на беразе возера Дрывяты — не проста месца тутэйшай пабожнасці, але жывое сведчанне трывалай веры. Цэлыя пакаленні мужчын і жанчын прыбывалі сюды, каб аднавіць сваю надзею і ўмацаваць сваю вернасць. У Марыі — заранцы, якая прадвяшчае світанне, — мы знаходзім кіраўніцтва, абарону і прыклад пакоры, служэння і мужнасці. Сёння мы дзякуем за Яе жывую прысутнасць сярод нас — праяву вернай любові Бога, які ніколі не пакідае свой народ. І менавіта гэты досвед веры, які так непахісна перажываў гэты народ, надае паўнату значэння слову, абвешчанаму сёння.

Разважаючы над словамі прарока Ісаі: «Народ, які хадзіў у цемры, убачыў святло вялікае» (Іс 9, 1), арцыбіскуп заўважыў: "Гэтым народам з’яўляемся мы, якія часта перажывалі боль і пакуты трагічных падзей, наканаваных нам гісторыяй, але таксама падтрыманыя вернасцю, салідарнасцю і святлом веры, што ніколі не згасае. Гэтае святло — уваскрослы Хрыстус, а Марыя — світанак, які прадвяшчае Яго прыйсце. Сваім ціхім і адважным «так» Яна прымушае цемру пачынаць рассейвацца. Яна — жанчына, якая паверыла, якая спадзявалася насуперак усялякай надзеі, якая захоўвала ў сваім сэрцы Божае абяцанне да самага нараджэння Езуса ў Бэтлееме."

Далей прадстаўнік Папы Рымскага ўзгадаў словы Льва XIV скіраваныя да вернікаў падчас малітва «Анёл Панскі» 6 ліпеня 2025 года: «Касцёл і свет не маюць патрэбы ў людзях, якія выконваюць свае рэлігійныя абавязкі, выстаўляючы сваю веру напаказ як знешнюю шыльду; наадварот, ім патрэбныя рашучыя работнікі, гатовыя працаваць на ніве місіі; поўныя любові вучні, якія сведчаць пра Валадарства Божае, дзе б яны ні знаходзіліся. Магчыма, няма недахопу ў „выпадковых хрысціянах“, якія час ад часу аддаюцца нейкім добрым рэлігійным пачуццям або ўдзельнічаюць у нейкім мерапрыемстве, але мала хто гатовы кожны дзень працаваць на Божай ніве, узрошчваючы зерне Евангелля ў сваіх сэрцах, каб потым несці яго ў сваё штодзённае жыццё, у сем’і, на працу і ў навучальныя ўстановы, у розныя грамадскія асяродкі і тым, хто ў патрэбе». Арцыбіскуп падкрэсліў, што гэты заклік скіраваны да кожнага з нас.

"Папросім Марыю, жанчыну, якая адказала «так» і верную слугу, даць нам адважную і ўцелаўлёную веру, здольную слухаць Слова, жыць ім і абвяшчаць яго з пакорай і адвагай. Няхай Яе прыклад натхняе нас падтрымліваць надзею, спадарожнічаць у цяжкасцях і быць сапраўднымі сведкамі Божага Валадарства, куды б нас ні паслаў Пан Бог" — заклікаў іерарх.

Напрыканцы святой Імшы, пасля праспяванага гімна Te Deum — «Цябе, Бога, праслаўляем» — біскуп Алег Буткевіч перад копіяй абраза Валадаркі азёраў прачытаў малітоўны акт аддання пад апеку Маці Божай.

Жанна Закрэўская

23.08.2025