Ад Рыма да Найробі: стагоддзе Папы-тэолага яднае кантыненты

Парафіяльныя аб'явы Літургічны каляндар Катэхеза Кантакты Відэаматэрыялы

Ад Рыма да Найробі: стагоддзе Папы-тэолага яднае кантыненты

У свеце пачынаецца маштабная праграма да 100-годдзя з дня нараджэння Папы Бэнэдыкта XVI. Больш за дзесяць форумаў на чатырох кантынентах раскрыюць інтэлектуальную спадчыну Папы-тэолага.

Ватыканскі фонд, які носіць імя Пантыфіка, заснаваў адмысловы Міжнародны камітэт для каардынацыі ўрачыстасцей. Юбілейны марафон ахопіць Еўропу, Азію, Лацінскую і Паўночную Амерыку, а таксама Афрыку. Гэта ініцыятыва заклікана не проста ўшанаваць памяць, але і зрабіць навуковы метад Ёзэфа Ратцынгера жывым інструментам у сучасных дыскусіях. Маштаб святкаванняў падкрэслівае ўніверсальнасць думкі Бэнэдыкта XVI, якая выходзіць далёка за межы еўрапейскай культуры.

Як адзначыў старшыня «Фонду Ратцынгера — Бэнэдыкта XVI» і кіраўнік юбілейнага камітэта ксёндз Рабэрта Рэголі, векавая гадавіна — гэта шанец прадставіць думку Папы як суцэльную сістэму. Яго спадчына грунтуецца на асабістым вопыце сустрэчы з Хрыстом, які становіцца ключом да ўсёй тэалогіі, і на крытэрыі разумнасці, што вызначае чалавечае асэнсаванне рэчаіснасці.

Сімвалічны старт мерапрыемствам будзе дадзены 16 красавіка ў Рыме. У пасольстве Італіі пры Святым Пасадзе пройдзе прэзентацыя чацвёртага тома выбраных тэкстаў Бэнэдыкта XVI пад назвай «Вера будучыні. Будучыня Касцёла».

Гэта падзея адкрые цэлы шэраг канферэнцый, сярод якіх — цыкл лекцый у Аўстрыі пра кардынала Ратцынгера як прэфекта Кангрэгацыі веравучэння і калоквіум біскупаў і тэолагаў у індыйскім Бангалоры. Геаграфія мерапрыемстваў дэманструе актуальнасць папскай спадчыны для Касцёла ў розным грамадскім кантэксце.

Навуковыя сустрэчы пройдуць таксама ў Венгрыі, Калумбіі і Францыі. У Калумбіі міжнародная канферэнцыя засяродзіцца на шляхах веры, надзеі і любові, а ў Парыжы навукоўцы прааналізуюць знакамітыя прамовы Ёзэфа Ратцынгера, сказаныя ім у гэтай краіне. Асаблівая ўвага будзе нададзена Іспаніі, дзе ў кастрычніку пройдзе кангрэс «Прыгажосць літургіі» і адбудзецца адкрыццё статуі, прысвечанай Пантыфіку.

Кульмінацыяй 2026 года стане міжнародны сімпозіум у сталіцы Кеніі, Найробі, які пройдзе з 18 па 21 лістапада 2026 года. Тэма форуму — «Сузор’і надзеі: Афрыка і абнаўленне Касцёла ў бачанні Бэнэдыкта XVI» — падкрэсліць значнасць яго ідэй для афрыканскага кантынента.

Завершыцца 2026 год урачыстай цырымоніяй уручэння «Прэміі Ратцынгера» ў Ватыкане.

Аляксандр Амяльчэня, Vatican News