Дыяцэзіяльнае спатканне груп Апостальства дапамогі душам чысцовым адбылося ў Браславе

Парафіяльныя аб'явы Літургічны каляндар Катэхеза Кантакты Відэаматэрыялы

Дыяцэзіяльнае спатканне груп Апостальства дапамогі душам чысцовым адбылося ў Браславе

28 кастрычніка ў санктуарыі Маці Божай Валадаркі Азёраў у Браславе прайшла другая агульнадыяцэзіяльная сустрэча груп Апостальства дапамогі душам чыстцовым, якія дзейнічаюць у парафіях Віцебскай дыяцэзіі. Госцем чарговага спаткання стаў біскуп Алег Буткевіч.

Сустрэча распачалася а 10-ай гадзіне. Напачатку ксёндз Славамір Самковіч, душпастыр груп Апостальства дапамогі душам чыстцовым Віцебскай дыяцэзіі, прывітаў удзельнікаў і коратка падвёў вынікі дзейнасці Апостальства за апошні год. Святар адзначыў, што колькасць сяброў АДДЧ павялічалася, з'явіліся новыя парафіяльныя групы ў Відзах, Лынтупах, Пагошчы. Аб сваёй дзейнасці расказалі таксама аніматары новаўтвораных парафіяльных груп.

Сустрэчу працягнула адарацыя Найсвяцейшага Сакраманту. Вяночак за памерлых узначалілі аніматары парафіяльных груп.

Падчас паўтарагадзіннай адарацыі быў час не толькі на супольную малітву, але і на медытацыю і кантэмпляцыю ў цішыні перад Найсвяцейшым Сакрамантам. Жадаючыя змаглі прыступіць да споведзі, каб з чыстым сэрцам прыняць удзел у Эўхарыстыі і атрымаць поўны адпуст для сябе або ахвяраваць яго за душы, якія церпяць у чыстцы.

Пасля адарацыі адбылася канферэнцыя «Пра чысцец і наступствы нявырашаных пры жыцці спраў», якую правёў пробашч парафіі ксёндз Станіслаў Мжыглуд SDS. Цытуючы Катэхізіс Каталіцкага Касцёла, святар адзначыў, што тыя, хто памірае ў ласцы і сяброўстве з Богам, але яшчэ не ачышчаны цалкам, хоць ужо і ўпэўненыя ў сваім збаўленні, пасля смерці праходзяць ачышчэнне, каб дасягнуць святасці і ўвайсці ў нябеснае шчасце» (пар. ККК, 1030).

Некаторыя святыя, якія асабліва дапамагалі церпячым душам у чыстцы, неаднаразова казалі, што чысцец — гэта цудоўнае вынаходніцтва Бога, дзякуючы якому душы могуць вызваліцца ад усялякіх заганаў, схільнасцяў да граху і цалкам ачышчаныя прыйсці на сустрэчу з Панам Сусвету.

Прыводзячы разнастайныя сведчанні містыкаў і святых, якія мелі візіі і асаблівую сувязь з душамі, якія церпяць у чыстцы, святар заўважыў, што існуюць "тры залатыя ключы", якія адкрываюць неба — гэта любоў, пакора і адданасць Богу. Моцнай зброяй для нашага збаўлення, а таксама збаўлення душаў, якія церпяць у чыстцы з'ўляюцца разнастайныя выпрабаванні і пакуты, якія мы сустракаем на нашым жыццёвым шляху. Калі мы пераносім жыццёвыя выправбаванні з глыбокім даверам да Пана Бога, яны будуць мець вялікі духоўны плён для нас, а таксама паспрыяюць вызваленню душаў, якія церпяць у чыстцы і за якіх мы молімся.

А 13-ай гадзіне адбылася святая Імша, якую ўзначаліў ардынарый Віцебскай дыяцэзіі біскуп Алег Буткевіч. У гаміліі Яго Эксцэленцыя прадоўжыў разважанне над тэмай канферэнцыі. Іерарх адзначыў, што мы часта наракаем на Бога: "Ойча, за што мне гэтае цярпенне?", бо разглядаем жыццёвыя праблемы, хваробу як пакаранне. Аднак варта ўспрымаць нашы цяжкасці не як пакаранне, а як выпрабаванне. Многія святыя на працягу гісторыі малілі Пана Бога каб прыняць пакуту, як дар ачышчэння. Нават Езус Хрыстус прыйшоў у свет каб аддаць сваё жыццё пакутнай смерцю, хоць не меў ніводнага граху. Яго ахвяра была складзена, каб як мага больш людзей дасягнулі Нябеснага Валадарства.

Мы павінны імкнуцца зразумець, для чаго Пан Бог спасылае выпрабаванні на нашым жыццёвым шляху. Давер да Нябеснага Айца і малітва дапамогуць нам дасягнуць Божага Валадарства.

Напрыканцы Эўхарыстыі ксёндз Славамір Самковіч выказаў словы ўдзячнасці тым, хто прычыніўся да арганізацыі і правядзення спаткання, а таксама ўсім яго ўдзельнікам. Асаблівыя словы ўдзячнасці прагучалі ў адрас спадарыні Іны Сапун за музычнае аздабленне сустрэчы.

Агульнае фота на памяць завяршыла спатканне.

Са станоўчымі эмоцыямі і бадзёрым настроем, падсілкаваўшыся смачным абедам, які падрыхтавалі гаспадары, вернікі вырушылі ў дарогу дадому.

Жанна Закрэўская

28.10.2023